Umuyobozi mukuru wa kompanyi y’ibitoro mu Burusiya Lukoil witwa Ravil Maganov, yapfuye nyuma yo guhanuka mu idirishya ry’igorofa y’ibitaro biri mu murwa mukuru Moscow, nk’uko amakuru abivuga.
Kompayi yari akuriye yemeje urupfu rwe ariko ivuga gusa ko Maganov w’imyaka 67, “yapfuye kubera indwara ikomeye”.
Ibinyamakuru byo mu Burusiya bivuga ko yariho avurirwa mu bitaro bya Central Clinical Hospital i Moscow maze agapfa azize ibikomere.
Maganov ni umwe mu bakuru b’ibigo by’ubucuruzi binini baheruka gupfa mu buryo bw’amayobera. Abakora iperereza bavuze ko bari kurikorera aho yapfiriye kugira ngo hamenyekane uko byagenze.
Ibiro ntaramakuru Tass bisubiramo abantu batandukanye bavuga ko yahanutse mu idirishya ryo mu igorofa ya gatandatu y’iyo nzu, nyuma bakavuga ko yiyahuye.
Nyuma gato y’uko Uburusiya buteye Ukraine, inama y’ubutegetsi ya Lukoil yasabye ko aya makimbirane ahagarara vuba bishoboka, kandi ko yifatanyije n’abahuye n’akaga muri “aya mabi”.
Perezida w’ubutegetsi bw’iyi kompanyi, umuherwe Vagit Alekperov, yeguye kuri uwo mwanya muri Mata(4) nyuma y’uko Ubwongereza bumufatiye ibihano kubera ibyo bitero.
Hari abaherwe b’Abarusiya mu by’ingufu bapfuye mu buryo budasanzwe mu mezi ashize;
- Umurambo w’umuherwe Sergei Protosenya wahoze akuriye ikigo Novatek bawusanze uri hamwe n’uw’umugore we n’umukobwa we mu nzu yo muri Espagne muri Mata(4)
- Uwahoze ari visi perezida wa Gazprombank, Vladislav Avayev, basanze yapfuye we n’umugore we n’umukobwa wabo mu nzu yabo i Moscow, nabwo muri Mata
- Muri Gicurasi(5), umuherwe wahoze muri Lukoil witwa Alexander Subbotin yishwe n’umutima, bivugwa ko yari amaze gushaka ubundi buvuzi ku muntu wagereranywa n’umupfumu.
Lukoil niyo kompanyi nini yigenga y’ingufu mu Burusiya.
Mu itangazo yasohoye, iyi kompanyi yavuze ko izirikana ubuhanga bwo kuyobora bwa Maganov bwatumye iba imwe muri kompanyi z’ingufu nini ku isi.
Maganov yatangiye gukorera iyi kompanyi mu 1993, mu myaka ibiri ishize nibwo yabaye umukuru wayo.
