Amerika itewe impungenge n'akamo ka prezida w'Uburundi ko kwica abahuza ibitsina babisangiye
![](https://i0.wp.com/urtv.fr/wp-content/uploads/2024/01/image.jpeg?fit=640%2C360&ssl=1)
Mw’itangazo ryo ku rubuga rw’ubushikiranganji bw’imigenderanire ya Amerika n’amakungu, Amerika ivuga ko itewe umpungenge n’amajambo ya prezida Ndayishimiye ku bantu b’intege nke kandi bakumirwa.
Mu kiganiro n’abamenyeshamakuru itariki 29 Kigarama (12) mu 2023, cabereye mu ntara ya Cankuzo, Prezida Evariste Ndayishimiye yavuze ko ku bwiwe “abahuza ibitsina babisangiye tubabonye mu Burundi bari bakwiye kubajana kuri stade bakabatera amabuye”.
Muri iryo tangazo, Reta zunze Ubumwe za Amerika zihamagarira abategetsi b’Uburundi “kwubahiriza agateka ka zina muntu harimwo guhabwa ubutungane bungana kuri buri murundi wese”.
Mu ntango z’uyu mwaka, abantu 24 barafashwe i Gitega ku murwa mukuru wa politike bagirizwa uguhuza ibitsina bafise ibisa inyuma y’uko bari mu nama y’ishirahamwe ryitwa ‘Muco’.
Muri Myandagaro (8) uyu mwaka nyene abantu indwi muri abo baciriwe umunyororo wo hagati y’umwaka umwe n’imyaka ibiri na Sentare y’i Gitega ibahamije ‘uguhuza ibitsina bafise ibisa no guhimiriza abantu kuja mu buhumbu n’ubushurashuzi’, abandi bagirizwa hamwe bambitswe izera.
- Abatinganyi ‘bakwiye kubajana kuri stade bakabatera amabuye’ – Ndayishimiye29 Ukw’icumi na kabiri 2023
- Musenyeri Welby yidogera abarongoye Anglican muri Uganda bashigikiye itegeko rirwanya ubutinganyi10 Ukwa gatandatu 2023
- Tanzania yategetse ko abahuza ibitsina babisagiye muri Zanzibar bafatwa21 Ukw’icenda 2019
Abajijwe nimba Uburundi buzemera ingingo busabwa n’ibihugu biteye imbere yo kwubahiriza uburenganizira bw’abahuza ibitsina babisangiye, Prezida Ndayishimiye ntiyaciye hirya no hino.
Yagize ati:“Ngo ibihugu rutura biriko birahatira ibihugu bibayabaye ko bitegerezwa gukurikiza uwo mugambi ko bitawemeye ata mfashanyo bazoronka? Barayitwima… Barayitwima.”
Akoresheje ivyanditswe muri Bibliya asobanura ko Imana ishobora kurakarira isi kubera ivy’abarongorana bafise ibitsina bisa.
Ati:“Nico gituma, iki ntikikiri ikibazo mu Burundi. Jewe kubwa ngingo mba nibaza ko mwene abo bantu tubabonye mu Burundi bari bakwiye kubajana kuri stade bakabatera amabuye, kandi [ababikora] nta gicumuro boba bakoze.
“Uburundi kuva bubaho bwemera Imana imwe rudende yaremye ijuru n’isi…ugaca ufata uno munsi ngo ugomba kuyimanuza ngo wumvirije abo shetani yamaze kwizizira?
“Ni nkuko rero wombwira ngo mbega shetani n’Imana uhisemwo iki? Ushaka gutora shetani ni ace aja muri ivyo bihugu abeyo, ahubwo nibaza ko bamwe mwavuga bahurumbira kuja hanze baba bagiye kwakira iyo migenzo, baraherayo ntibatuzanire, n’uri hanze ntazotuzanire.”
![Prezida Evariste Ndayishimiye](https://i0.wp.com/urtv.fr/wp-content/uploads/2024/01/image.jpeg?resize=640%2C360)
Mu Burundi uwagirijwe guhuza igitsina n’uwo bagisangiye ashobora guhanishwa umunyororo w’imyaka ibiri n’ihadabu. Mu bihugu bishika 11 kw’isi ivyo bishobora kuguhesha igihano co gupfa.
Muri ivyo bihugu harimwo Uganda aho kuva muri Rusama (5) uyu mwaka yemeje amategeko ategekanya ibihano birimwo ico kwicwa ku vyaha bigendanye n’abahuza ibitsina bisa. Ayo mategeko ariko ariyamirizwa muri sentare n’abaharanira uburengannzira bwa zina muntu ngo akurweho.