Iyi ntwari y’Uburundi yarahemukiwe bikomeye.
“Yagandaguwe afise imyaka 29 gusa. Mu mezi yakurikiye urupfu rwiwe, abana biwe, Marie-Thérèse na Marie-Pia, barapfuye mu buryo budatahuritse. Umukenyezi wiwe, Marie-Rose Ntamikevyo, yaribagiwe abaho mu bwoba n’ubukene gushika yitavye Imana muri munyonyo 1973. Ntiyashinguranywe iteka ry’umukenyezi w’incungu y’Uburundi.
Se, Umwami Mwambutsa IV Bangiricenge, yaratembagajwe arangazwa, yaguye mu Buswisi, igihugu ciwe nta teka camuhaye nk’uwakibereye Umwami imyaka 50 anakivyarira incungu.
Murumunawe, Umwami Ntare V Karori Ndizeye, yaratembagajwe arangazwa, mu nyuma arafatwa agarukanwa nk’imbohe, yicwa rubi mw’ikambi y’abasirikare i Gitega. We nta n’imva afise.
Nyina, Umwamikazi Tereza Kanyonga, yabayeho mu bukene gushika arasandaba mu 1986, ashingurwa nk’umuntu asanzwe.
Amatungo yiwe yaranyazwe n’umugambwe yashinze kandi yapfiriye, abiwe babaho mu bukene.
Twagumye tumuririmba gusa. Ijambo ryiwe turaryumviriza buri wa 13 gitugutu, ariko tugaca turyibagira. Twaramwitiriye ibarabara, ibitaro, stade, twamushize ku noti, ariko twiyobagiza abiwe. Ubu yogaruka akatubaza ivyo twakoreye abiwe twokwishura iki ?
Uburundi burakwiriye gusaba imbabazi umuryango w’Umwami Mwambutsa. Akarenganyo uwo muryango wakorewe, amaraso yasheshwe bizoguma ari umuvumo ku gihugu. Ni vyiza ko twofuta ubwiyorobetsi, tugakosora ako kahise kabi.” NGAYO AMARANGAMUTIMA Y’UMUKUNZI W’IJWI RY’URUGWIRO I BUJUMBURA
NewLatter Application For Free
